Ons Storie
Johan en Monét se reis saam het in 2023 heel onverwags afgeskop! Nadat die lewe ’n paar wye draaie met elkeen van hulle geloop het, het ’n vriend se suster hulle op ’n dag aan mekaar voorgestel en aangemoedig om mekaar beter te leer ken. Hul eerste afspraak was tydens een van Johan se eksamenmerksessies in Johannesburg. Monét het toe nog in Weltevredenpark gewoon saam met haar vier wollywe – Bonnie, Tyler, Muggie en Tommy. Die vier was stille getuies van iets wat spoedig van verlief wees na liefde gegroei het. Johan het geweet dat as hy Monét se diere aan sy kant kan kry, dit kinderspeletjies sal wees om haar hart te wen!
Wat soos toeval gelyk het, het gou iets besonders geword. Die heen-en-weerryery tussen Pretoria en Weltevredenpark het baie ver begin voel, aangesien selfs die honde saam moes ry as Monét vir Johan gaan kuier het en andersom. Dit is toe dat Monét, onder aanmoediging van Johan, besluit het om aansoek te doen vir ’n onderwyspos in Pretoria, wat toe ook goed uitgewerk het. Alles het net in plek geval! God se plan vir hul lewens het sigbaar geword, en ná 18 maande (wat vir Monét soos ’n ewigheid gevoel het!), op Monét se verjaarsdag, het Johan haar Dullstroom toe geneem, en soos die naweek aanbeweeg het, het hy by elke plekkie gestop om ‘n foto van ‘n spesiale herinnering vir haar te stuur. Die laaste stop (by die gastehuis), het Johan twee spesiale foto’s vir haar gewys met die vier diere wat met ‘n ring ‘pose’. Natuurlik het sy ja gesê! Nie net het Johan vir Monét nou in sy lewe gehad nie, maar sommer ook ’n hele huis vol diere!
